Síðbúið póstkort frá Lanzarote ( ógleymanlegur afmælisdagur )

Eins og flest ykkar vita dvaldi ég á Lanzarote á afmælisdaginn minn 3.september. Ætli þetta hafi ekki verið í fyrsta skipti sem ég hef haldið uppá afmælið mitt í útlöndum. Átta manna hópur fór saman út að borða þetta kvöld í lítinn bæ sem heitir Yaiza. Lögðum af stað um kvöldmatarleytið frá hótelinu okkar í afar eftirminnilega bílferð í leigubíl þar sem bílstjórinn keyrði benz bifreið sína á tvöföldum leyfilegum hámarkshraða. Sumum farþegum stóð ekki á sama og héldu að líf sitt væri jafnvel á enda runnið. En við lifðum þetta af. Myndin er svo tekin á veitingastaðnum sem varð fyrir valinu. Maturinn var alveg framúrskarandi góður og þjórfé var borgað með bros á vör. Að kvöldmáltíð lokinni héldum við svo á vit ævintýranna og upplifðum einskonar menningarnótt þeirra eyjaskeggja. Þar voru útitónleikar, leiktæki fyrir börnin, en athyglisverðast þótti mér að allir voru að skemmta sér án þess að hafa áfengi um hönd.