Bakþankar Jóns Gnarr

Jón Gnarr skrifaði þennan pistil í fréttablaðið fyrir ekki svo löngu síðan. Ég var svo innilega sammála þessari grein að ég ákvað að birta hana í heild sinni hér þar sem ég hef voða lítið að segja sjálfur þessa dagana.

"Ég sá viðtal við Landlækni í fréttunum á dögunum. Samkvæmt upplýsingum Landlæknis smitast um 2000 manns af klamydíu á hverju ári á Íslandi. Það er frekar ömurleg flensa, klamydían. Landlæknir sagði að það væri auðvelt að minnka þessa tölu ef fleiri notuðu smokka. Einfalt mál eða hvað?

Hvað með að fara að hætta að finnast það í lagi að fólk hátti sig uppí rúmi með fólki sem það þekkir ekki? Er maður eitthvað klikkaður ef manni finnst það ekki í lagi? Og er það bara í lagi að börn sofi hvert hjá öðru ef þau nota smokka? Nei, þetta er bara rugl.

Sjöunda boðorðið hljómar svo: Þú skalt ekki drýgja hór. Einfalt mál. Jesú áréttar þetta og bætir við að það sé nóg að horfa á annað fólk girndaraugum til að fremja hór í huga sínum. Jesú ráðlagði okkur að elska náungann án þess að þurfa að sofa hjá honum. Og hann sagði þetta ekki vegna þess að honum væri illa við að fólk svæfi saman og skemmti sér. Hann bara vissi. Hvað ætli makaskipti og framhjáhald séu búin að eyðileggja margar fjölskyldur á Íslandi?

Boðorðin 10 eru ekki einhverjar reglur sem Móse datt í hug að setja, einn daginn bara til að vera með leiðindi. Þau eru byggð á mörgþúsund ára reynslu. Það hefur bara sýnt sig að það borgar sig ekki að gera þessa hluti. Synd er ekki að leiðrétta geðþóttaákvarðanir Guðs og njóta frelsis. Að syndga er að brjóta gegn lögmálum lífsins. Við mennirnir erum nefnilega svo miklir óvitar að við vitum oft ekki hvað við erum að skaða okkur sjálf og aðra mikið með hegðun okkar. Ef við reynum að fylgja þessum einföldu tillögum þá verður líf okkar léttara.

Að sofa hjá fólki sem maður þekkir ekki hefur slæmar afleiðingar og er tilgangslaust nema til þess eins að drepa tímann. Svo er það líka stórhættulegt. Það setur mark sitt á tilfinningalífið og hefur slæmar sálrænar jafnt sem líkamlegar afleiðingar.

Kynlíf er eins og nammi. Það er gott en maður á að njóta þess í hófi. Annars fær maður niðurgang og tannpínu og verður slæmur á taugum. Og meira sukk og frelsi með hjálp smokka og fóstureyðinga er ekki svarið. Besta getnaðarvörnin er í heilanum. Hættum að finnast í lagi að drýgja hór."