Mikil ölvun í gangi

Uss, þetta var nú meiri helgin, skandalar og læti. Gunni Gunn djammaði aðra helgina í röð og spurning hvort hann þurfi ekki að panta sér tíma á Vogi ef heldur áfram sem horfir. Strákurinn var vel brattur á því og skipulagði partý á Rauðarárstígnum hjá Ástu frænku þar sem fór fram eins konar upphitun fyrir Sálarball á Nasa. Benni mætti á svæðið með gítarinn og tókum við nokkra eldheita sálarslagara og stemmningin var gríðarleg. Þar sem gestir voru ekki alveg með textana á hreinu þurfti ég að stýra fjöldasöngnum og tókst mér bara bærilega upp þó ég segi sjálfur frá. Enda kann ég allflest sálarlögin líkt og um faðir vorið væri að ræða. Þegar ölvun var orðin slík að menn vissu vart í þennan heim né annan lá leiðin á Nasa. Endurkoma Sálarinnar virtist hitta vel í mark því húsið var kjaftfullt. Að sjálfsögðu tók ég mér stöðu fremst við sviðið eins og ég á vanda til. Þar gerðist stúlka nokkur ansi ágeng við kappann og vildi greinilega ná sér í öndvegis mannsefni. Þó ég hafi aðeins spilað með til að byrja með og tekið þátt í einhverjum faðmlögum auk fleiri viðlíka ástaratlota rann þó upp fyrir mér ljós um síðir. Þessi ágæta snót var ekki alveg minn tebolli, sérstaklega þegar fór að renna af mér mesta áfengisbölið og ég gat farið að hugsa ögn skýrar. Ég lét mig því hverfa út úr gamla sjálfstæðishúsinu við Austurvöll tiltölulega sáttur við guð og menn en þó sérstaklega að vera laus úr klóm þessa ágenga kvenmanns sem ætlaði að éta mig upp til agna. Úff ég segi ekki meir. Að lokum vil ég þakka Ellý fyrir skemmtilegt djamm.