Með stjörnur í augum

Gunni Gunn var heldur betur árrisull og brá sér á morgunæfingu hjá íslenska landsliðinu í knattspyrnu. Létt var yfir mönnum, engir blaðamenn voru viðstaddir æfinguna og veðrið var með prýðilegasta móti miðað við árstíma enda alltaf sól í Kópavoginum. Æfingin gekk vel að sögn Loga Ólafssonar og menn í fínu standi fyrir átökin gegn Möltu en eins og allir vita etja strákarnir kappi við Maltverja á laugardag ytra. Einnig er gaman að segja frá því að vitleysingarnir í 70 mínútum á Popp Tíví voru mættir á svæðið og sprelluðu eins og þeim einum er lagið. Að lokinni æfingu gaf sjálfur fyrirliðinn Eiður Smári sér tíma fyrir myndatöku en það var ekki lakari maður sem var bakvið myndavélina, varnarjaxlinn sterki í Charlton, Hermann Hreiðarsson. Það má því segja að öllu hafi verið tjaldað til og ánægjulegt að fá þessa mynd hér á mínum heimaslóðum. Eins og sjá má á myndinni er Mister Gudjohnsen að sjálfsögðu með alvöru keppnis tan þannig að ég lít út eins og draugur við hliðina á honum. Spurning um að skella sér í ljós þrisvar í viku og vinna í mínum málum??