Ef þú spilar til að vinna

Að geta sér til um úrslit leikja er ótrúlega spennandi og skemmtilegt áhugamál sem við strákarnir höfum verið að stunda undanfarnar vikur. Enski boltinn er vinsæll sem aldrei fyrr og maður fylgist ætíð með af miklum móð um helgar. Að freista gæfunnar og tippa á þar tilgerðan enskan seðil gerir þetta nefnilega ennþá áhugaverðara. Ég ákvað að taka daginn snemma í morgun og rölta upp í sjoppu og fylla út seðil. Það jafnast fátt á við göngutúr til að koma blóðrásinni af stað í morgunsárið. Heyra fuglasönginn í morgunkyrrðinni gerir það að verkum að maður vaknar betur til lífsins. Ég er ótrúlega getspakur að eðlisfari enda kom það í ljós síðar um daginn að ég var með 11 leiki rétta af 13. Ég geri fastlega ráð fyrir því að það verði einskonar hefð hjá mér í framtíðinni að vakna snemma á laugardagsmorgnum. Mancester United og Sunderland sáu til þess að ég fékk ekki 13 rétta. Gunni Gunn sá ástæðu til að fagna þessum litla vinningi sínum líkt og Arsenal leikmennirnir hér til hliðar. En eins og allir vita eru Arsenal orðnir Englandsmeistarar og stefna á að verða fyrsta liðið frá stofnun úrvalsdeildarinnar til að komast í gegnum heilt keppnistímabil án þess að tapa leik. Það yrði mikið afrek ef svo fer.