Virkilega góð kvikmynd í alla staði

Ónafngreindur fjölskyldumeðlimur bað mig um að koma með sér í kvikmyndahús. Ég jánkaði þessu boði heilshugar enda ókurteisi að hlaupast undan þá sjaldan sem einhver nennir að koma með manni í bíó. Ég hafði ekki minnstu hugmynd um hvað myndin kæmi til með að heita né því síður um hvað hún fjallaði en ákvað samt að láta slag standa og drífa mig með viðkomandi. Kannast einhver við leikstjórann Alejandro González? Nei, ég hélt ekki. Þessi mikli snillingur gerði myndina Amores Perros ( Love's a ***** ). Í þessari nýju mynd frá kappanum sem heitir 21grams hefur hann fengið til liðs við sig þrjá fína leikara, Sean Penn, Benicio Del Toro og Naomi Watts. Einstaklega skemmtilegt hvernig myndin flakkar í tíma, fram og tilbaka, aftur á bak og áfram. Það má eiginlega segja að hún sé nákvæmlega eins uppbyggð og Amores Perros. Það eru þrjár sögur í gangi, við fáum að fylgjast með lífi þriggja ólíkra persóna og svo sameinast þessar persónur á ákveðnum tímapunkti í myndinni. Umfjöllunarefni myndarinnar er ástvinamissir, hefnd, hatur, fyrirgefning og hvernig við þurfum að sætta okkur við þá staðreynd að lífið heldur áfram þó svo að glíma þurfi við mótlæti. Mér finnst þetta afskaplega velheppnað handrit, leikararnir alveg framúrskarandi enda komst ég að því að bæði Sean Penn og Naomi Watts eru tilnefnd til óskarsverðlauna fyrir leik sinn. Dramatískt meistaraverk sem lætur engan ósnortin.