Nú fer fjörið að byrja

Strákarnir okkar í handbolta eru komnir til Slóveníu og eiga þar að etja kappi við heimamenn á fimmtudagskvöld. Þjóðin er bjartsýn á góðan árangur enda er Guðmundur Guðmundsson landsliðsþjálfari með sterkt og leikreynt lið í höndunum. Undirbúningurinn hefur gengið framar vonum. Við tókum Dani í kennslustund, töpuðum reyndar fyrir Svíum með einu ( það er enginn skömm ) og unnum Egypta. Strákarnir hafa sett sér skýrt markmið fyrir þessa keppni sem framundan er, að vinna riðilinn en þess má til gamans geta að við erum í riðli með Slóvenum, Tékkum og Ungverjum. Allt eru þetta þjóðir sem kunna sitthvað fyrir sér í handbolta og við megum alls ekki vanmeta. Það er gríðarlega erfitt að spá fyrir um okkar fyrsta leik gegn gestgjöfum Slóvena sem hafa á að skipa heimsklassa leikmönnum í flestum stöðum. Eitt er þó víst, þetta verður rosalega spennandi leikur og ekki síður mikilvægur, því nauðsynlegt er að byrja mótið vel. Það verður töluverð pressa á heimamönnum og spurning hvernig þeir höndla hana, einnig má gera ráð fyrir því að heimadómgæsla geti leikið okkar menn grátt. Engu að síður hallast ég að tveggja marka sigri okkar manna 29 - 27. Ég ætla ekki að breyta út af vananum og bið ykkur lesendur góðir að skjóta líka á úrslit. Það er um að gera að halda í góða siði.