Föstudagur 2. janúar ( Minn staður, mín stund )

- Vaknaði eldsnemma og las moggann upp í rúmi áður en ég fór í vinnuna. Sá að ljósmyndari Morgunblaðsins hafði náð mynd af berbrjósta stelpunni með djöflahornin sem ég hafði einnig myndað. Ég get montað mig af því að ég náði betri myndum en sjálfur Mogginn.
- Nú verður maður að reyna að brosa í gegnum tárin. Sætta sig við orðinn hlut, láta sem ekkert hafi í skorist. Hugsa jákvætt og vona það besta. Þetta er jú enginn heimsendir. Sálverjar hafa ákveðið að taka sér ótímabundið hlé frá tónleikahaldi. Auðvitað skil ég vel þessa ákvörðun þeirra. Strákarnir hafa verið ótrúlega atorkusamir á árinu 2003 og mættu meir að segja á þjóðhátíð til Eyja. Kærkomið frí sennilega. Það er nátturulega líka alltaf hættan á að fólk fái leið á hljómsveitum sem eru mikið í sviðsljósinu og að því leiti gæti þetta verið skynsamleg lausn, sterkur leikur. Persónulega finnst mér að þeir ættu að takmarka böllin niður í fjögur eða fimm á ári.
- Ágúst Þór Gunnarsson og Hólmfríður Sigurðardóttir buðu mér og foreldrum mínum í dýryndis kvöldmat. Skellti mér svo til systur minnar og horfði á Idolið og laumaðist í smá pizzu þar.
- Ekkert sérstaklega skemmtilegur Idol þáttur en ætli ég fylgist ekki með til enda fyrst maður byrjaði á annað borð að glápa á þetta. Mjög fyrirsjáanlegt hver myndi detta út. Tinna stóð sig alls ekki vel. Kalli kom með come back. Jón er með níu líf eins og Bubbi sagði. Anna Katrín með skásta móti fannst mér og Ardís alltaf jafn traust. Ég ætla að spá því að 500 kallinn detti út í næsta þætti. Svo segi ég ykkur eftir viku hver mun standa uppi sem sigurvegari Idol Stjörnuleitar 16. janúar í Smáralind.